Home >  Berita >  Umum

Saleum Perubahan..

Saleum Perubahan..
Jum'at, 05 April 2019 00:47 WIB
Penulis: Opini Hery Safrizal
Surat teubuka keu sahabat dan senior loen njang maju bak Pileg thon 2019 njoe - Hana teurasa uroe H hana le troeh dua go aleuhad teuk. Mulai fhoen glong posko, meuroek tim, konsolidasi, kampanye, rapat, bagi sumbangan, lakee restu, bagi kalender dan pasang spanduk phet saket ka neu keurija.

Taloe rugoe meunang laba tanggal 17 njoe keuh penentuan, penentuan dari ujian njang ka neupeulaku dari padum padum beuleuen ulikoet, raport bak tanggai 17 eunteuk akan teujaweub droeneuh ek glah atawa hana, raport yang peujadeh droeneuh meu-kanto lam parlemen atawa hana, dan raport njan tjit njang akan bi jawaban kiban hubungan droeneuh singoeh keulai ngon TIM njang lawet njoe sabee sajan.

Kamoe masyarakat akan meukalon droeneuh, bila ie muka droeneuh na neu kalon-kalon kamoe ngon tulus ikhlas, kon wab pemilu saja! Kamoe kasep jra ngon janji politik meulisan bak buju tulueng rueng meu blah thoen, karena kamoe hana meugadee honda ngon rumoh batee, keu semprot gulee dan cangkoi keupila.

Cang baliho, priek spanduk, toet moto, ceulaka ureueng kon lah gaya dan etika tanjoe Aceh, jak ta peunjata bak nanggroe dan doenja laen bahwa bangsa Aceh meu moral meu agama dan dewasa gaya meu politik. Harapan kamoe bek wab beda lumboi beda warna, ka ta plah plah teumalang, beda pilihan ka ta koh koh sjedara.

Ads
Evaluasi et na ka kesiapan dan kematangan TIM njang neu baiat setia sajan droeneuh. Dan persentase dukungan masyarakat njang saban faham ngon visimisi droeneuh, neu evaluasi tjit pue lom strategi lanjutan, pue na janji yg galom meutunai, amunisi, dan media publikasi. karna lazem jih maken toe uroe raya beulanja maken hana teu-control dan rinyah.

Semoga watee bagi raport singoh, nan droeneuh na roeh lam bareh buku induk di parlemen.

Tanjoe pemain, Allah Azza wa Jalla njang po skenario, Ta tanom njang jroeh, ta pot pih jroh.. Insya Allah.

Pasee, 05 April 2019

Hery Safrizal/Panglima Muda Tanjong Direktur Eksekutif LABANG BANGSA LSM Pemantau pemilukada Aceh 2017
Kategori : Umum, Aceh Timur
www www